Friday, 5 June 2020

आईसफ्रुट

उन्हाळ्यात रोज संध्याकाळी आईस्क्रीमची आठवण येते असे खूप लोक असतात. खरं तर आईस्क्रीमच पाहिजे असं काही नसतं. काहीतरी गारेगार हवं असतं. मग शाळेत असताना खात होतो ते गारेगार आईसफ्रुट आठवतात. बाहेरून आणलेलं त्याच त्याच चवीचं, भरपूर पैसे खाऊन वजन वाढवून देणारं आईस्क्रीम नको वाटतं. अशा वेळी आपणच पर्याय शोधतो. प्रयोग यशस्वी होतो आणि एवढे साधे साधे आनंद घरात बसावं लागल्यानंतर सापडताहेत याचं आनंदाचा बेस असलेलं खंत फ्लेवरचं नवल वाटायला लागतं!
तर आज आईसफ्रुट केलंच ! कसं ते सांगते. हे घरातल्या मुलांना करायला सांगा अजूनच गोड होईल 🙂
असतील त्या फळांचे तुकडे घेऊन ते साच्यात भरायचे. त्यांना एकत्र बांधायला आवडीनुसार सरबत.
ते या फोडींवर हळुहळू ओतायचं. साच्यात बुडबुडे रहायला नकोत. आणि मग फ्रीजरमध्ये ठेवून द्यायचं. पूर्ण गोठायला 4 तास लागले. बाहेर काढलं की साचा अर्धा मिनिट पाण्यात बुडवून ठेवायचा. मग हलक्या हाताने हे आईसफ्रुट बाहेर काढायचे. मस्त फोटो काढून खायला घ्यायचे.
यात असंख्य चवी करता येतील. साखर घाला किंवा नका घालू. कोणतंही फॅट म्हणजे क्रीम दूध वगैरे घालायची गरज नाही. फळं ताजी असतील तर उत्तम. फ्रोजनही वापरता येतील.
मुलांना विशेष आवडतील कारण त्यांच्या आईस्क्रीमच्याही ठराविक ब्रँड च्या आवडीनिवडी अजून गोठलेल्या नसतात !
या फोटोत दिसत आहेत त्यात पिवळ्या किवी,द्राक्षं, स्ट्रॉबेरी,केळी वापरले आहेत.लिंबू सरबत काळं मीठ घालून बेस म्हणून घातलं आहे.

बेस आणि फळं
कोकम सरबत आणि सफरचंद,टरबूज
नारळपाणी केळीचे नारळाचे काप टरबूज
बिनादुधाचा चहा लिंबाच्या चकत्या घालून
डाळिंबाचा रस पपई सफरचंद
संत्र्याचा रस,द्राक्षं, डाळिंब
द्राक्षं रस संत्री मोसंबी स्ट्रॉबेरी
लिंबू पाणी किंचित हिरवी मिरची घालून पेरूच्या फोडी
आवळा सरबत केळी पुदिना
लिंबू सरबत दालचिनी मिरी आणि सफरचंद काप
लिंबू रस अननस द्राक्षं करवंदे
नारळपाणी आंबा केळी शहाळ्याची मलई करवंद
पाणीपुरीचे पाणी त्यात अननस घालून
चिंच गूळ एकदम पातळ पाणी करून त्यात कैरी तिखट मीठ
उसाचा रस सफरचंद लिची
जांभूळ, करवंदे, चेरी,लिची, जाम,ताडगोळे,फणस हे विसरले होते !
दही बेस म्हणून वापरून पण हे सगळे कॉम्बिनेशन्स करता येतील.
दालचिनी, आलं,मध,वेलची,केशर,बडीशेप असे फ्लेवर्स पण वापरता येतील.
मी या उन्हाळ्यात बाहेरचं आईस्क्रीम न खाता हे प्रयोग करणार आहे ! तुम्ही काय काय करताय ते कमेंट्समध्ये नक्की सांगा. ते ही करून बघेन. आणि इथे दाखवेनही 🙂

No comments:

Post a comment